פרק קכא
{א} שִׁיר לַֽמַּעֲלוֹת אֶשָּׂא עֵינַי אֶל הֶהָרִים מֵאַיִן יָבֹא עֶזְרִֽי: {ב} עֶזְרִי מֵעִם יְהוָה עֹשֵׂה שָׁמַיִם וָאָֽרֶץ: {ג} אַל יִתֵּן לַמּוֹט רַגְלֶךָ אַל יָנוּם שֹֽׁמְרֶֽךָ: {ד} הִנֵּה לֹֽא יָנוּם וְלֹא יִישָׁן שׁוֹמֵר יִשְׂרָאֵֽל: {ה} יְהוָה שֹׁמְרֶךָ יְהוָה צִלְּךָ עַל יַד יְמִינֶֽךָ: {ו} יוֹמָם הַשֶּׁמֶשׁ לֹֽא יַכֶּכָּה וְיָרֵחַ בַּלָּֽיְלָה: {ז} יְֽהוָה יִשְׁמָרְךָ מִכָּל רָע יִשְׁמֹר אֶת נַפְשֶֽׁךָ: {ח} יְֽהוָה יִשְׁמָר צֵאתְךָ וּבוֹאֶךָ מֵֽעַתָּה וְעַד עוֹלָֽם:
