פרק קכ
{א} שִׁיר הַֽמַּעֲלוֹת אֶל יְהוָה בַּצָּרָתָה לִּי קָרָאתִי וַֽיַּעֲנֵֽנִי: {ב} יְֽהוָה הַצִּילָה נַפְשִׁי מִשְּׂפַת שֶׁקֶר מִלָּשׁוֹן רְמִיָּֽה: {ג} מַה יִּתֵּן לְךָ וּמַה יֹּסִיף לָךְ לָשׁוֹן רְמִיָּֽה: {ד} חִצֵּי גִבּוֹר שְׁנוּנִים עִם גַּחֲלֵי רְתָמִֽים: {ה} אֽוֹיָה לִי כִּי גַרְתִּי מֶשֶׁךְ שָׁכַנְתִּי עִֽם אָהֳלֵי קֵדָֽר: {ו} רַבַּת שָֽׁכְנָה לָּהּ נַפְשִׁי עִם שׂוֹנֵא שָׁלֽוֹם: {ז} אֲֽנִי שָׁלוֹם וְכִי אֲדַבֵּר הֵמָּה לַמִּלְחָמָֽה:
