פרק צח
{א} מִזְמוֹר שִׁירוּ לַֽיהוָה שִׁיר חָדָשׁ כִּֽי נִפְלָאוֹת עָשָׂה הוֹשִֽׁיעָה לּוֹ יְמִינוֹ וּזְרוֹעַ קָדְשֽׁוֹ: {ב} הוֹדִיעַ יְהוָה יְשׁוּעָתוֹ לְעֵינֵי הַגּוֹיִם גִּלָּה צִדְקָתֽוֹ: {ג} זָכַר חַסְדּוֹ וֶֽאֱֽמוּנָתוֹ לְבֵית יִשְׂרָאֵל רָאוּ כָל אַפְסֵי אָרֶץ אֵת יְשׁוּעַת אֱלֹהֵֽינוּ: {ד} הָרִיעוּ לַֽיהוָה כָּל הָאָרֶץ פִּצְחוּ וְרַנְּנוּ וְזַמֵּֽרוּ: {ה} זַמְּרוּ לַיהוָה בְּכִנּוֹר בְּכִנּוֹר וְקוֹל זִמְרָֽה: {ו} בַּחֲצֹצְרוֹת וְקוֹל שׁוֹפָר הָרִיעוּ לִפְנֵי הַמֶּלֶךְ יְהוָֽה: {ז} יִרְעַם הַיָּם וּמְלֹאוֹ תֵּבֵל וְיֹשְׁבֵי בָֽהּ: {ח} נְהָרוֹת יִמְחֲאוּ כָף יַחַד הָרִים יְרַנֵּֽנוּ: {ט} לִֽפְֽנֵי יְהוָה כִּי בָא לִשְׁפֹּט הָאָרֶץ יִשְׁפֹּֽט תֵּבֵל בְּצֶדֶק וְעַמִּים בְּמֵישָׁרִֽים:
