פרק ע
{א} לַמְנַצֵּחַ לְדָוִד לְהַזְכִּֽיר: {ב} אֱלֹהִים לְהַצִּילֵנִי יְהוָה לְעֶזְרָתִי חֽוּשָֽׁה: {ג} יֵבֹשׁוּ וְיַחְפְּרוּ מְבַקְשֵׁי נַפְשִׁי יִסֹּגוּ אָחוֹר וְיִכָּלְמוּ חֲפֵצֵי רָעָתִֽי: {ד} יָשׁוּבוּ עַל עֵקֶב בָּשְׁתָּם הָאֹמְרִים הֶאָח הֶאָֽח: {ה} יָשִׂישׂוּ וְיִשְׂמְחוּ בְּךָ כָּֽל מְבַקְשֶׁיךָ וְיֹאמְרוּ תָמִיד יִגְדַּל אֱלֹהִים אֹהֲבֵי יְשׁוּעָתֶֽךָ: {ו} וַאֲנִי עָנִי וְאֶבְיוֹן אֱלֹהִים חֽוּשָׁה לִּי עֶזְרִי וּמְפַלְטִי אַתָּה יְהוָה אַל תְּאַחַֽר:
