פרק ו
{א} לַמְנַצֵּחַ בִּנְגִינוֹת עַֽל הַשְּׁמִינִית מִזְמוֹר לְדָוִֽד: {ב} יְֽהוָה אַל בְּאַפְּךָ תוֹכִיחֵנִי וְֽאַל בַּחֲמָתְךָ תְיַסְּרֵֽנִי: {ג} חָנֵּנִי יְהוָה כִּי אֻמְלַל אָנִי רְפָאֵנִי יְהוָה כִּי נִבְהֲלוּ עֲצָמָֽי: {ד} וְנַפְשִׁי נִבְהֲלָה מְאֹד (ואת) וְאַתָּה יְהוָה עַד מָתָֽי: {ה} שׁוּבָה יְהוָה חַלְּצָה נַפְשִׁי הוֹשִׁיעֵנִי לְמַעַן חַסְדֶּֽךָ: {ו} כִּי אֵין בַּמָּוֶת זִכְרֶךָ בִּשְׁאוֹל מִי יֽוֹדֶה לָּֽךְ: {ז} יָגַעְתִּי בְּֽאַנְחָתִי אַשְׂחֶה בְכָל לַיְלָה מִטָּתִי בְּדִמְעָתִי עַרְשִׂי אַמְסֶֽה: {ח} עָֽשְׁשָׁה מִכַּעַס עֵינִי עָֽתְקָה בְּכָל צוֹרְרָֽי: {ט} סוּרוּ מִמֶּנִּי כָּל פֹּעֲלֵי אָוֶן כִּֽי שָׁמַע יְהוָה קוֹל בִּכְיִֽי: {י} שָׁמַע יְהוָה תְּחִנָּתִי יְהוָה תְּֽפִלָּתִי יִקָּֽח: {יא} יֵבֹשׁוּ וְיִבָּהֲלוּ מְאֹד כָּל אֹיְבָי יָשֻׁבוּ יֵבֹשׁוּ רָֽגַע:
