פרק כח
{א} לְדָוִד אֵלֶיךָ יְהוָה אֶקְרָא צוּרִי אַֽל תֶּחֱרַשׁ מִמֶּנִּי פֶּן תֶּֽחֱשֶׁה מִמֶּנִּי וְנִמְשַׁלְתִּי עִם יוֹרְדֵי בֽוֹר: {ב} שְׁמַע קוֹל תַּחֲנוּנַי בְּשַׁוְּעִי אֵלֶיךָ בְּנָשְׂאִי יָדַי אֶל דְּבִיר קָדְשֶֽׁךָ: {ג} אַל תִּמְשְׁכֵנִי עִם רְשָׁעִים וְעִם פֹּעֲלֵי אָוֶן דֹּבְרֵי שָׁלוֹם עִם רֵֽעֵיהֶם וְרָעָה בִּלְבָבָֽם: {ד} תֶּן לָהֶם כְּפָעֳלָם וּכְרֹעַ מַֽעַלְלֵיהֶם כְּמַעֲשֵׂה יְדֵיהֶם תֵּן לָהֶם הָשֵׁב גְּמוּלָם לָהֶֽם: {ה} כִּי לֹא יָבִינוּ אֶל פְּעֻלֹּת יְהוָה וְאֶל מַעֲשֵׂה יָדָיו יֶהֶרְסֵם וְלֹא יִבְנֵֽם: {ו} בָּרוּךְ יְהוָה כִּי שָׁמַע קוֹל תַּחֲנוּנָֽי: {ז} יְהוָה עֻזִּי וּמָגִנִּי בּוֹ בָטַח לִבִּי וְֽנֶעֱזָרְתִּי וַיַּעֲלֹז לִבִּי וּֽמִשִּׁירִי אֲהוֹדֶֽנּוּ: {ח} יְהוָה עֹֽז לָמוֹ וּמָעוֹז יְשׁוּעוֹת מְשִׁיחוֹ הֽוּא: {ט} הוֹשִׁיעָה אֶת עַמֶּךָ וּבָרֵךְ אֶת נַחֲלָתֶךָ וּֽרְעֵם וְנַשְּׂאֵם עַד הָעוֹלָֽם:
