פרק ג
{א} מִזְמוֹר לְדָוִד בְּבָרְחוֹ מִפְּנֵי אַבְשָׁלוֹם בְּנֽוֹ: {ב} יְהוָה מָֽה רַבּוּ צָרָי רַבִּים קָמִים עָלָֽי: {ג} רַבִּים אֹמְרִים לְנַפְשִׁי אֵין יְֽשׁוּעָתָה לּוֹ בֵֽאלֹהִים סֶֽלָה: {ד} וְאַתָּה יְהוָה מָגֵן בַּעֲדִי כְּבוֹדִי וּמֵרִים רֹאשִֽׁי: {ה} קוֹלִי אֶל יְהוָה אֶקְרָא וַיַּֽעֲנֵנִי מֵהַר קָדְשׁוֹ סֶֽלָה: {ו} אֲנִי שָׁכַבְתִּי וָֽאִישָׁנָה הֱקִיצוֹתִי כִּי יְהוָה יִסְמְכֵֽנִי: {ז} לֹֽא אִירָא מֵרִבְבוֹת עָם אֲשֶׁר סָבִיב שָׁתוּ עָלָֽי: {ח} קוּמָה יְהוָה הוֹשִׁיעֵנִי אֱלֹהַי כִּֽי הִכִּיתָ אֶת כָּל אֹיְבַי לֶחִי שִׁנֵּי רְשָׁעִים שִׁבַּֽרְתָּ: {ט} לַיהוָה הַיְשׁוּעָה עַֽל עַמְּךָ בִרְכָתֶךָ סֶּֽלָה:
