פרק קנ
{א} הַלְלוּיָהּ הַֽלְלוּ אֵל בְּקָדְשׁוֹ הַֽלְלוּהוּ בִּרְקִיעַ עֻזּֽוֹ: {ב} הַֽלְלוּהוּ בִגְבוּרֹתָיו הַֽלְלוּהוּ כְּרֹב גֻּדְלֽוֹ: {ג} הַֽלְלוּהוּ בְּתֵקַע שׁוֹפָר הַֽלְלוּהוּ בְּנֵבֶל וְכִנּֽוֹר: {ד} הַֽלְלוּהוּ בְתֹף וּמָחוֹל הַֽלְלוּהוּ בְּמִנִּים וְעוּגָֽב: {ה} הַֽלְלוּהוּ בְצִלְצְלֵי שָׁמַע הַֽלְלוּהוּ בְּֽצִלְצְלֵי תְרוּעָֽה: {ו} כֹּל הַנְּשָׁמָה תְּהַלֵּל יָהּ הַֽלְלוּיָֽהּ:
