פרק קיג
{א} הַלְלוּיָהּ הַלְלוּ עַבְדֵי יְהוָה הַֽלְלוּ אֶת שֵׁם יְהוָֽה: {ב} יְהִי שֵׁם יְהוָה מְבֹרָךְ מֵֽעַתָּה וְעַד עוֹלָֽם: {ג} מִמִּזְרַח שֶׁמֶשׁ עַד מְבוֹאוֹ מְהֻלָּל שֵׁם יְהוָֽה: {ד} רָם עַל כָּל גּוֹיִם יְהוָה עַל הַשָּׁמַיִם כְּבוֹדֽוֹ: {ה} מִי כַּיהוָה אֱלֹהֵינוּ הַֽמַּגְבִּיהִי לָשָֽׁבֶת: {ו} הַֽמַּשְׁפִּילִי לִרְאוֹת בַּשָּׁמַיִם וּבָאָֽרֶץ: {ז} מְקִֽימִי מֵעָפָר דָּל מֵֽאַשְׁפֹּת יָרִים אֶבְיֽוֹן: {ח} לְהוֹשִׁיבִי עִם נְדִיבִים עִם נְדִיבֵי עַמּֽוֹ: {ט} מֽוֹשִׁיבִי עֲקֶרֶת הַבַּיִת אֵֽם הַבָּנִים שְׂמֵחָה הַֽלְלוּיָֽהּ:
